جريدة غزل
الوصول صعب ولكن معًا نستطيع. .. جريدة غزل لدعم الكُتاب عن طريق نشر كتاباتهم بأنواعها لتصل إلى القُرَّاء بسهولة، لمؤسستها سها عبد النبي، تحت إشراف تطبيق وجريدة لَحْظة.
حبوني قبل ما أموت
هيقولو بعد مااموت
بنحبها والله
كانت جدعة وبنت ناس ونبيلة
كانت عندها ذوق وجميلة
وهيحكو بالتفصيل كل يوم عشناه
ويقولو عشنا معاها وقسمنا ملح وعيش
وكت بنت موت واتخطفت من وسطنا ف مفيش
وصوان عزايا هيقفل الشارع
وصلاة جنازتي هتزحم الجامع
ونا هبقي شايفة وسامعة كل ده
وكأني لسه ف وسطهم وبعيش
في الجنازة هتلقي ناس عدوت ف حياتي
من سنين معرفش عنهم أي حاجة
اللي كان في الفصل جنبي من البداية
واللي كان دايما يذاكر معايا
واللي جمعت بينا صورة
واللي كان دايما يجيلي
والقرايب والمعارف والحبايب والجيران
كل واحد كنت عارفه وكان عارفني
كل واحد عدي فيا وخد مكان
كل قصة حب بدأت وانتهت بنهاية باردة
ييجي واحد كان سايبني جمب قبري يسيبلي وردة
كلهم هيحسو بالحب المفاجئ
كلهم هيقولو اني كنت طيبة
وأما يفتكرو أننا من سن واحد
ياخدو بالهم أن مالك الموت قريب
واللي قصر ف الصلاه هيتوب شويه
واللي مستحلي الغلط هيفوق شوية
بعد فترة
كل حاجه في يوم هترجع هيا هيا
اللي تاب يرجع يقصر
واللي فاق يرجع يتوه
كاس وكل الناس مسيرهم يشربوه
الا أهلي
أهلي هيحسو بغيابي في كل ثانية
أمي بعد مااموت دي هتبقي ف دنيا تانية
يعني مثلا ...كل يوم هتخش أوضتي
بس مش هتقولي قومي
مش هتفضل بتعاتبني
إن نص حياتي نوم
مش هتلقي اللي يساعدها لما تعمل أي حاجة
مش هتلقي اللي يناغشها أو تبرطم بالكلام
فيه مكان ع الأكل فاضي كنا كام وبقينا كام
أختي كل ماتكوي حاجة هتفتكرني
كنت رامية الحمل كله عليها هيا
كل حاجة في بيتنا هتفكرها بيا
كل ماهتفتح دولابي وكل ماترتب سريري
وأما تعوز تحكيلي حاجة
مش هتحكي لحد غيري
حتي أبوياا
اللي عمري ماشفته دمع
مش هتنشف يوم عينيه
لما اموت هتحب جدا حب كنت اتمني أشوفه حب كنت أتمني أعيشه وأحس بيه
أنا لسه عايشة وسطكم وصحيح وقتي مجاش
حبوني دلوقتي قبل مايفوت الآوان
أنا نفسي أحس بحبكم
حبوني قبل مااهرب منكم.
ـ وفــاء صــبــري' | الأمــيــرة الــصــامــتــة
التصنيف
شعر
عظمه🤩❤️❤️❤️❤️❤️
ردحذف