اجبلك ورد | "جريدة غزل"

"اجبلك ورد"

اجبلك ورد..

وخاتم، في علبه قطيفه..

وشوية هدايا لطيفه..

ساعه مثلا، وشوكولاته..

عارفك بتحبي الأناقه..

واجي واتقدم، واشرب شاي..

وكمان قهوه، ومن ايديكي..

واقولك ساعتها هي حلوة ازاي..

يا مَحلي قلبي لما يناديكي..

اشوف كسوفك وخجلك..

اشوف ضحكتك وقلقك..

هما يحكو، وأنا.. أنا مركز وياكي..

وأسرح مع عنيكي، وأدوب في هواكي..

أشوفك مثلا .. قصيده بكتبها..

أو يمكن غنوة بعزفها..

اقولك تسلم ايدك..

وتحمر ساعتها خدودك..

طب نقرا الفاتحه..

ونقول مبروك..

ولقيت الفرحه..

وقلبي انا مبسوط..

ست البنات، وصف مش كفايه..

دبلتك في ايدي اجمل بدايه..

ياحلم العمر وبدايته..

يا أصدق حب حسيته..

اشوفك وردة تضحكلي..

اشوفك قلب حبيته..

يا كل اللي جاي والأتي..

يا فرحة عمري وحياتي..

سندي، وبنتي ومراتي..

تشاركيني كل قراراتي..

ونجيب بنوته تشبهلك..

وتبقي في الاخر حبيبتي..

وهتبقي انتي اللي بنتي..

واحس بغيرتك ساعات..

تقوليلي مطنشني اوقات..

ومركز بس مع بنتك..

اضحك واقولك بحبك..

واشوفك طفله في غيرتك..

واحب حركة ايديكي..

واركز مع نظرة عنيكي..

وساعات طريقة كلامك..

وحبك ليا وحنانك..

فاكر يومها قولتيلي..

هبقى ضلك، وأمانك..

وفاكر بردو لما وعدتيني..

عمري ما اقدر لحظه اسيبك..

قلبي حتى قالي، دا حبيبك..

واللي حبوا في يوم يا قلبي..

عمره يوم ما ساب حبيبه..

لـِ هاجر محمد عرفه.